Tri ndeshjet e zhvilluara sot në kuadër të xhiros së 26-të të IPKO Superligës së Kosovës në futboll kanë përfunduar baras, shkruan Gazeta Express.

Prishtina është ndalur nga Llapi, me të cilin barazoi në stadiumin “Zahir Pajaziti” me rezultat 1:1.

Goli i Ahmed Januzit, i realizuar në pjesën e parë, ishte i pamjaftueshëm për kryeqytetasit pasi Mentor Zhdrella realizoi gol të bukur nga gjuajtja e lirë në pjesën e dytë për të nivelizuar gjithçka.

Ndërkohë, të dyja ekipet e kanë qëlluar nga një herë tërthorësen në pjesën e parë.

Ky barazim mund t’i kushtojë Prishtinës, e cila tash mbetet katër pikë prapa lideres, Drita.

Me barazim u ndal edhe Ballkani, i cili nuk arriti më shumë se një rezultat 1:1 ndaj Ferizajt në udhëtim.

Arbër Prekazi i kaloi therandasit në epërsi në pjesën e parë.

Kurse, Albin Krasniqi me një gol maestral nga gjuajtja e lirë e barazoi rezultatin në fund të pjesës së dytë.

Ky barazim e largon edhe më shumë ekipin Portokalli me titull të kampionit.

Ballkani mbetet 5 pikë prapa Dritës.

Ndërkohë, derbi lokal ndërmjet Feronikelit dhe Drenicës, i zhvilluar sot në Drenas ka përfunduar baras pa gola, 0:0. /Gazeta Express/